Служба Трифону Вятскому

 Для скачивания: Никодимовская служба преп Трифону Вятскому

IMG_04

СЛУЖБА Преподобному отцу нашему Трифону Архимандриту Вятскому Чудотворцу

к Церкви Богоявления Господня приложенная сыновьями Василья Ермолаева Калашникова 1838 года

ФОНД  ЧЕРДЫНСКОГО  КРАЕВЕДЧЕСКОГО  МУЗЕЯ  (ЧМ № 1043/45)

Из книг Градо-Чердынской Богоявленской библиотеки № 74-й  

МЕСЯЦА ОКТЯБРЯ В 8-й ДЕНЬ

Память преподобнаго отца нашего Трифона Архимандрита Вятского Чудотворца

НА ВЕЛИЦЕЙ ВЕЧЕРНИ

 

На Господи, воззвах: стихиры на 8, глас 8.

Подобен: О, преславнаго чудесе:

 

Отче преподобне Трифоне вперив ум свой к Богу верою, мирскаго смешения возгнушался еси неуставнаго, в крест свой взем, Всевидцу последовал еси, тело непокоривое подвиги и воздержанием помыслу поработив, силою Божественнаго Духа.

Отче богомудре Трифоне, ты от утробы матерни Христови приближився, и всем смыслом Тому прилежа, и от своих подвиг Богу Вседержителю плоды достойныя принося, преподобне, добродетельными венцы украшаем, тем благих наслаждение обрел и восприял еси досточудне.

Преподобне отче Трифоне, болящим ты явися еси исцеление, и хромым хождение милостивно сотворяеши, и всем притекающим с верою к цельбоносному гробу твоему, и просящим помощи и заступления ты бо молитвами твоими исцеление неоскудно подаваеши.

 

Ины стихиры, глас 2.

 

Киими похвальными венцы увязем отца нашего Трифона, добродетели сокровище, сосуд чистоты, приятелище благодати и источник исцелений, егоже ради врагов шатания Христос низложи, имеяй велию милость.

Киими песненными добротами похвалим отца нашего наставника, пустыннаго гражданина, целомудрия врача безмездна, егоже ради врагов шатания Христос низложи, имеяй велию милость.

Киими смиренными устнами ублажим добрых рачителя, постника истинна, бедным помощника, в душевредных страстех обуреваемым предстателя, прибегающим пристанище, егоже ради врагов шатания Христос низложи, имеяй велию милость.

 

Слава, глас 6:

     Придите, постническое сословие, духовный лик составим, и пения трубою возглашающе благодарственными гласы отцу нашему возопием глаголюще: радуйся Христов подвижниче, преподобне Трифоне, любовию бо Сего оставил еси мир; радуйся, иже тело свое постом и труды изнуривый, вечныя ради блаженныя воистину жизни; радуйся честный, телом и душею озаряяся непрестанно сиянием Христа Бога: нам же творящим честную память твою, моли избавитися всякаго гнева и тли и мучения, блаженне.

 

И ныне,  Богородичен: Кто Тебе не ублажит:

Вход.   Прокимен дне.   И чтения.

Премудости Соломоновы чтение (главы 5 и 6):

     Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я  и мышцею защитит их. Приимет всеоружие рвение Свое и  и вооружит тварь в месть врагом. Облечется в броня правды и возложит шлем, суд нелицемерен. Приимет щит непобедимый,  преподобие. Поострит же напрасный гнев во оружие; споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы, и, яко вихор, развеет их и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества, и гордящиися о народех языков, яко дана есть от Господа держава вам и сила от Вышняго.

 

Премудрости Соломоновы чтение (глава 4):

     Праведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его.  Рачение бо злобы помрачает добрая, и парение похоти применяет ум незлобив. Скончався вмале, исполни лета долга. Угодна бо бе Господеви душа его, сего ради потщася от среды лукавствия. Людие же видевше и не разумевше, ниже  положше в помышлениитаковое. Яко благодать и милость в преподобных Его, и посещение во избранных Его.

 

Премудрости Соломоновы чтение (глава 3):

     Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благдетельствовани будут, яко Бог искуси я и обрете их достойны Себе. Яко злато в горниле искуси их и яко всеплодие жертвенное прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему. Яко благодать и милость в преподобных Его, и посещение во  избранных Его.

 

На литии стихиры, глас 1:

     Светлая память успения твоего, преподобне отче Трифоне, сердца наша просвещает, зрящее бо честную твою раку, врачевство страстем неисцелным подающу, славим прославльшего тя Господа, и твоя поты трудов и подвиги возгнавша Своею благодатию. Тем и мы усердно подвигов и трудов твоих емшеся, твоею стезею ко Христу Богу ходити познахом; Егоже моли спасти  просветити души наша.

Глас 2:

     Во успении твоем, блаженне, учительница нам бывает твоя рака. Присно бо изливающимися чудесы вопиет, возводя путем к трудом и подвигом, глаголя: возлюбите Господа, да обрящете благодать вечную, и ничтоже предпочтите паче любви Его. Да егда придет, наследите покои со всеми святыми. Егоже и улучити да сподобимся твоими молитвами.

 

Глас 8:

     Преподобне отче, всечестне Трифоне, добрыми детельми к Богу пошед яко на колесницу востекл еси, победныя почести от Него приемля. Тело же твое трудолюбное яко милоть во гробе нам оставил еси, отче, источати исцеление и прогоняти духи лукавыя, темже тя ублажаем, всечестне.

 

Слава, глас 8:

     Монахов множества наставника тя почитаем, отче наш Трифоне, твоею бо стезею воистину право ходити познахом. Блажен еси, Христу работав, вражию обличил еси силу, ангелом собеседниче, преподобных сопричастниче и праведных, с ними же молися Господеви помиловатися душам нашим.

 

И ныне, Богородичен: Безневестная Дево:

На стиховне стихиры, глас 8.

Подобен: О, преславнаго чудесе:

     Имея Божественную благодать Учителя целомудрия, целомудрием тя наставляюща к желанию Божественному, отнюдуже мирскаго мятежа отрекся, ко истинному разуму возведен был еси, болезненными труды себе умудряя, повинуя же лучшему горшее, Трифоне преподобне, моли спастися нам.

Стих: Честна пред Господем смерть преподобных его.

Добродетели удержати потщався, имиже Богу присвоитися желая, к Нему востекл еси, Егоже и светолитие приемля, ходатайствуеши о нас рабех твоих, еже мирно житие скончати и желаемое блаженство получити, спастися же от соблазн льстиваго твоими к Богу молитвами.

Стих: Блажен муж, бояйся Господа, в заповедех Его восхощет зело.

Общником быти некончаемыя радости сподоби твоими молитвами, преподобне отче наш Трифоне, всем приходящим с верою к цельбоносному твоему гробу, и просящим помощи и заступления твоего, яко да испросим тобою нам велию милость.

 

Слава, глас 6:

     Преподобне отче, во всю землю изыде вещание исправлений твоих, тем же на Небесех обрел еси мзду трудов твоих. Демонския погубил еси полки и Ангельския достигл еси чины. Ихже житию непорочно поревновал еси; дерзновение имея ко Господу, мир испроси душам нашим.

 

И ныне,  Богородичен, глас тойже: Творец:

Тропарь, глас 4:

 

Яко светозарная звезда возсиял еси от востока до запада; оставль бо твое отечество, дошел еси Вятския страны, Богоспасаемаго града Хлынова; и в нем обитель во славу Пречистыя Богородицы создав, и, тамо на добродетель вперився, собрал еси иночествующих множество, и, сих наставляя на путь спсения, был еси Ангелом собеседник и постником сопричастник, Трифоне преподобне, с ними Христа Бога моли спастися душам нашим.

 

НА УТРЕНИ

 

По 1-м стихословии седален, глас 5:

     Постника Господня песньми почтим, яко умертвивша вся прилоги страстей воздержанием твердым и крепким, воистину терпением посрамивша зело сопротивнаго всю гордыню, и ныне молящася Господеви помиловатися душам нашим.

Слава и ныне, Богородичен:

     Страшно чудо зачатия и несказанен образ рождества в Тебе познася, Честная Приснодево, ужасает ми ум и удивляет помышления; слава Твоя, Богородице, всем простреся, во спасение душ наших.

 

По 2-м стихословии седален, глас 4:

     Превозшед еси прилоги вражия, Божественною благодатию вжиляем, постом и бдением ум очищая и молитвою к Богови приближаяся, отнюдуже и бесом явился еси прогонитель, Трифоне преподобне, моли спастися душам нашим.

 

 

Слава и ныне, Богородичен:

     Обновила еси, Чистая, Божественным рождеством Твоим истлевшее страстьми земнородных естество, и воставила еси от смерти к жизни нетления. Темже Тя по долгу вси ублжаем, якоже прорекла еси.

 

По полиелеи седален, глас 8:

     Посту и бдению, отче, прилежа, безгневием и кротостию украсился еси, образы тем предлагая и законы воображая, имиже к разуму Божественному сих возвл еси, Трифоне преподобне, моли Христа Бога нашего грехов оставление даровати чтущим память твою.

Слава и ныне, Богородичен:

     Яко Деву едину в женах, Тя, без семене рождшую Бога плотию, вси ублажаем роди человечестии, огнь бо вселися в Тя Божества, и яко младенца доила еси Зиждителя и Господа. Темже Ангельский и человеческий род достойно славим пресвятое Рождество Твое, и согласно вопием Ти: моли Христа Бога грехов оставление воспевающим достойно славу Твою.

 

Степенна, 1-й антифон 4-го гласа.

Прокимен, глас 4: Честна пред Господем//  смерть преподобных Его.

Стих: Что воздам  Господеви о всех, яже воздаде ми?

Евангелие от Матфея, зачало 43.

По 50-м псалме стихира, глас 6:

     Преподобне отче, слухи своя прилежно Евангелию вдав, услышал еси Божественный глас, зовущ в небесное Царство, и добре последовал еси. Мира красная яко уметы вменив, единаго доброты возжелал  еси Христа, Емуже прилежно молися мирови низпослати мир и Церквам единомыслие, и Императору  нашему на сопостаты победное одоление, и душам нашим велию милость.

 

Канон Пресвятей Богородице со ирмосом на 6

и преподобному два канона  на 8.

Канон преподобному Трифону, глас 2.

Песнь 1

     Ирмос:  Грядите людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Радуйся, источниче кипящии струи, спасения от нихже почерпаем целебную благодать, и прегрешений избавляемся, любовию приходящие к тебе, приснопамятне.

Святыню прием от Христа Бога от утробы матерни, славне, явился еси избранный сосуд, духовную благодать всю приемый.

Да живота нетленнаго причастник явишися, временны, отче премудре, небрегл еси, и к Богу пришед, непрестанно молишися спастися всем нам.

Богородичен: Словесем премудрым Твоих устен последующе, радующеся, Пренепорочная, Тя ублажаем, бывшую нам виновну неизреченнаго блаженства.

Ин канон преподобному, глас 4.

Песнь 1

     Ирмос:    Моря чермную пучину невлажными стопами древний пешешествовав Израиль, крестообразныма Моисеовыма рукама Амаликову силу в пустыне победил есть.

Божественною Пресвятаго Духа блистался благодатию, иже светоносное твое и честное успение творящих, Трифоне преподобне, светлою молитвою твоею страстей мглу очисти.

Преподобне отче, крест свой взем, последовал еси распеншемуся Слову, нас ради, и плотская двизания воздержанием, преподобне, и низу леганием умертвил еси.

Пощением, молитвами и слезами Богови соединяяся, приял еси благодать от Него целити недуги и отгонити лукавыя духи, Трифоне богомудре треблаженне.

Богородичен: Облечеся из Тебе Бог в человека за благодать сугуб пройде, Пресвятая, Чистая, действы и естествы, Егоже моли всегда просветити поющия Тя.

 

Песнь 3

     Ирмос:  На камени мя веры утвердив, разширил еси уста моя на враги моя, возвеселибося дух мой, внегда пети: несть свят, якоже Бог наш, и несть праведен паче Тебе, Господи.

Всесветлый, богомудре, показался еси столп, наставляя чины иноков,

облак же, осеняющ жребий Божий, и лица невидимых врагов помрачающ, благодатию всех Царя и Бога.

Стоиши пред лицеем своего Владыки, неослабным укрепляем мановением, молися избавитися стаду твоему от работы темныя, преподобне, и мучительства страстей избежати, ибо твоих молитв послушает Бог.

Плоти твоея двизания умертвив крепким пощением, богоглагольниче, быв еси обитель Владычня, моли избавитися скорбей и страстей, смущения, к тебе прибегающим.

Богородичен: Свиток Тя провиде Исаия, в немже Слово плотски назнаменася, раздрав начертание первозданнаго, еже преступлением написа, подаде оставление работы всем нам.

 

Ин

     Ирмос:   Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

Яко же второе солнце на земли, добродетелей просвещением просиял еси всем души, преподобне, благодатию просвещая духовною.

Железом чресла твоя препоясана имел еси, страстем на умерщвление, и телесе озлобление претерпел еси, Трифоне преподобне, безстрастием яве одеявся.

Человеколюбив быв немощным в житии своем, и сего ради приял еси от Бога многую благодать, преподобне, целити страсти неисцельныя.

Богородичен: Слово Божие во Твое нескверное чрево вселися, и земных, пречистая, всякия грехи омыл есть Своею благостию.

 

Седален, глас 8.

     Отрекся плоти сладострастия Христа ради, духовный пастырь людем явился еси, услышав словеса Спасителева тайных Его учений, сказуя же иноком и собою являя правде правило. Страсти вся крепко попрал еси. Тем и вражия коварства до конца потребил еси, к Богу взирая всегда, блаженнее Трифоне. Егоже моли грехов оставление подати чтущим любовию святую память твою.

Слава, глас тойже:

    Яко звезду незаходимую световидну вси тя почитаем, добродетелей сиянием и чудес зарями мир просвещающа, и восхваляем, блаженне Трифоне, причастник бо явился еси Божественныя светлости, и Его незаходимаго светолития зритель показался еси, к Немуже и востекл еси. Темже и мы светоносную и святую память совершаем, Спаса славящее и верно вопиюще: грехов оставление моли подати чтущим любовию святую  память твою.

И ныне, Богородичен:

     Солнца облаче светлый, Божественнаго света свещнице златокованый, нескверная и непорочная, Пречистая Владычице, омраченную душу мою  слепотою страстей безстрастия зарею просвети, молюся, и оскверненное сердце мое омый умилением покаяния, плачем же от скверных мя  очисти дел моих, да любовию зову Ти: Богородице Приснодево, моли Христа Бога прегрешений оставление даровати ми: Тебе бо надежду имею, раб Твой.

 

Песнь 4

     Ирмос:    Пою Тя, слухом бо, Господи, услышах и ужасохся, до мене бо идеши, мене ища заблуждшаго, тем многое Твое снисхождение, еже на мя, прославляю в молитве.

Желание тя Божественное распали, огнем бо его согреяся твое сердце, и желанная достиг еси до конца, богомудре отче, оставль же земных пристрастие, единожитель был еси вышним служителем.

Ласкания сверстник твоих попрал еси всеобразно, вниде бо рачение в тя, богомудре, тепле, и задних мрачная до конца отринул еси.

На пажить чистую воздержания возвел еси стадо твое, отче, ко источником спасения немутнаго бесстрастия, разумныя звери побеждая твоими к Богу молитвами.

Богородичен: Се славят Тебе роди родов, Богомати Пресвятая, якоже прорекла еси, Отроковице, Создателя бо была еси палата и храм Божественный, в немже вселився Вышний, плотию одеявся, да спасет нас.

 

Ин

     Ирмос:   Вознесена Тя видевши Церковь на Кресте, солнце праведное, ста в чине своем, достойно взывающи: слава силе Твоей, Господи.

Струями, преподобне, слезными сердце свое очищая, молитвами твоими на безводнем месте воде истекати устроил еси, Богу тя прославляющу, Трифоне преподобне, яко Своего угодника.

Преславным житием твоим яко звезда сияя, священными чудесы яко другое небо ты показался еси верою, блаженнее, зовущим: слава силе Твоей, Господи.

Законам повинуяся, преподобне, Владычним, еже к пастве твоей сущаго Богоразумия усугубил еси данный тебе талант, яко раб послушлив, своему Владыце Христу.

Богородичен: Привлеченный ум мой, Богородительнице, к телесным сладостем, Твоим ходатайством, молюся, утверди, Владычице, яже едина рождшая Благодетеля Бога нашего.

 

Песнь 5

     Ирмос:    Просвещение во тьме лежащих, спасение отчаянным, Христе Спасе мой, к Тебе утреннюю, Царю мира, просвети мя сиянием Твоим, иного разве Тебе Бога не знаю.

Весь Богу возложився, отче, в пустынях мраз зимний претерпел еси, и сподобился еси дом быти премудрости Божия, добродетельным сиянием Богоукрашаем.

От юности прилежав пощению многу, чревобесия змия не приял еси советника, отче преподобне; алчбою же и жаждею и непрестанными молитвами и чистотою телесною Богови соединився, причастник быти сподобился еси пищи небесныя.

Добродетельными восходы на горняя восшед, скрижали приял еси, блаженнее, Богописанныя; иноков стада научил еси вещественных детелей огребатися и весьма отбегати, возводя их на гору Божественнаго разума.

Богородичен: Явилася еси, Чистая, древле праотца лествица небес высочайшая, имущая твердый восход, из Тебе бо сошед Слово Отчее плотию, совокупи разстоящаяся  естества. Темже вси Тя, Богородительнице, славим.

 

Ин

     Ирмос:   Ты, Господи, мой свет в мир пришел еси, Свет Святый, обращая из мрачна неведения верою воспевающия Тя.

Ум твой, преподобне, явися честными к Богу мановеньми весь укрепляем, блаженнее, плотских сладострастий превышший показася.

Сый врач душам и телесем, пребогате, отжени плотские и душевредные болезни, благодатию Божественнаго Духа.

Блажен еси, и добро тебе будет, победившему всю силу вражию и страсти, преблаженне, до конца умертвившему.

Богородичен: Родила еси преблагаго Бога, и по рождестве Дева пребыла еси, Богоневесто, сего ради Тя вси роди человечестии ублажаем.

 

Песнь 6

     Ирмос:    Ко господу от кита Иона возопи: Ты мя возведи из глубины ада, молюся, да яко Избавителю во гласе хваления истины же духом пожру Тебе.

Владычнею любовию вжиляем, вся красная мира сего оставил еси любве Его ради, Тому последовал, благий ярем на рамо взем, мужески пошел еси.

Наказан неизреченных разума, блаженне, научил еси стадо твое Небесная разумевати, и страстей нашествия отгоняти твоими поучении, досточудне.

Житие твое подобно бысть вышним Небесным силам, преподобне, сего ради яко имея дерзновение к Богу, вся содержащему, молися от страстей избавити христоименитое стадо твое.

Богородичен: Провидев Твое неизреченное, Чистая, духом таинство, Аввакум предвозвести,  и гору Тя нарече приосененную, из Тебе бо всех Содетель воплощся Спасе наш.

Ин

     Ирмос:   Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшию Кровию.

Единогласным точию призыванием святаго твоего имени, и омытием воды, исходящия во обители твоей, трясавичная болезнь от человек отгоняется и всяк вред бесовский молитвами твоими потребляется.

Победив плотскаго навета мудрование, Духа Святаго благодать приял еси отгоняти плотския недуги и душевныя страсти целити, Трифоне преподобне.

О чудо предивное! Како от единаго токмо призывания, болящия спасаются твоим явлением, преславне Трифоне, и бед и напастей свобождаются твоими к Богу молитвами.

Богородичен: Умертви плоти моея, Дево, мудрование, Умертвителя смерти заченшая и рождшая Жизнодавца, паче слова и разума, Пречистая.

 

Кондак, глас 2:

Подобен: Вышних лица:

     Волнений множество невлажно происходяще, безплотныя враги струями слез твоих крепко погрузил еси, богомудре Трифоне преподобне, и чудес дар прием, моли непрестанно о всех нас.

 

Икос:

     Отверзи ми устне, преблаженне, Богоприятными твоими молитвами, предстоя Господеви, преславне Трифоне, да воспою равноангельное житие твое, и возглаголю достойно яже на земли, вся добродетели твоя  Богоизбранные, столп бо и забрало явился еси иноком, и правде правило пресветлое. Темже вшел еси воистину в незаходимая; моли непрестанно о всех нас.

 

 

Песнь 7

     Ирмос:   Купина в горе огнеопальная и росоносная пещь халдейская яве предписа Тя, Богоневесто. Божественный бо невещественный в вещественнем чреве огнь неопально прияла еси, темже из Тебе Рождшемуся поем: благословен еси, Боже отец наших.

Авраамский нрав стяжал еси, премудре Трифоне, и от земли отечества твоего Произведый тя Господь, пресельника сотвори Вятския страны, идеже Сего узрел еси обещавающи ти воздаяние богатно, Емуже веселяся усердно пел еси: благословен еси, Боже отец наших.

Распалаем Святым Духом, преподобне, козни вражеския разорил еси, Крестным оружием ограждаяся нас ради пригвоздившагося Сына Божия, Емуже, веселяся, усердно пел еси: благословен Бог отец наших.

В горняя небеса к Богу молитвами твоими приступил еси, и вшед в пресветлый облак, в незаходимая сподобился еси Божия Славы видения. Отнюдуже прием разум, веселяся пел еси: благословен Бог отец наших.

Богородичен: Закона исполнение родила еси Сына, Превечнаго всяческих Бога и Господа, премудрости  наказателя земнородных, Емуже упорно поем: благословен Бог отец наших.

 

Ин

     Ирмос:   В пещи Аврамстеи отроцы персидстеи любовию паче, нежели пламенем опаляеми, взываху: благословен еси в храме славы Твоея, Господи.

Слезными тучами пламень страстей погасил еси, и ныне огнем молитв твоих, блаженнее, попаляеши вся душетленные недуги Божественною благодатию.

Всеусердно Творца твоего возлюбил еси, Емуже, Трифоне мудре, взывал еси: благословен еси в храме славы Твоея Господи.

Якоже древо при исходищах вод, воздержанием, отче, насажден быв, воздал еси плоды чудес действо от честнаго твоего образа, Трифоне пребогате, благовременно всегда изобилуяся.

Богородичен: Бури безмерных моих прегрешений, Отроковице, избави мя, едина смиренных помощь крепкая и грешных очищение, зовущих: благословенна Ты в женах еси, Всенепорочная Владычице.

 

Песнь 8

     Ирмос:   В пещь огненну ко отроком снизшедшаго и пламень в росу преложшаго Бога пойте дела яко Господа и превозносите во вся веки.

Твоими, яже к Богу, слезными течении огнепальныя страсти потопил вси, геенскаго же пламени страх погасил еси, отче мудрее, совершенною любовию Господа своего, праведно поя  во вся веки.

Якоже вторый Енох к Богу пришед, от Него прият был еси отче, и с вышними ликостоянии водворяяся, поеши: вся дела Господа пойте и превозносите во вся веки.

Ныне на небесех нетленных даров от Бога наслаждаяся и трисолнечныя Его светлости исполняяся, Трифоне блаженне, певцы твоя молитвами твоими страстныя мглы избави, поющих и превозносящих Господа во вся веки.

Богородичен: Древнюю клятву разрушила еси, Пречистая,  неизрченным словом Бога Слова заченшая, Воплощенное из Тебе за милосердие, Всенепорочная Владычице, верных спасение, Егоже превозносим во вся веки.

Ин

     Ирмос:  Руце распростер Даниил, львов зияния в рове затче, огненную же силу угасиша, добродетелию препоясавшееся, благочестия рачители отроцы, взывающе: благословите вся дела Господня Господа.

Яко пресветлое утро просиял еси, яко светозарная звезда и яко великое солнце озарил еси Божественною благодатию вопиющих: вся дела благословите Господня Господа.

Место во обители Твоей безводное, якоже вторый Моисей, молитвами твоими многоводно сотворил еси и цельбоносно показал еси приходящим с верою, черплющим, пиющим и Христу зовущим: вся дела благословите Господня Господа.

Видети тамошняго баженства и вечнаго наслаждения, святе, сподобился еси, и святых светлости зриши, и радостию всегда с ними поеши: вся дела благословите Господня Господа.

     Богородичен: Недуговавшую тяготою лютых, смиренную мою душу, и жаждею греховною палиму, Богоблагодатная Владычице чистая, напой спасенными водами, и здраву до конца покажи, зовущу: вся дела благословите Господня Господа.

 

 

Песнь 9

     Ирмос:  От Бога Бога Слова, неизреченною мудростию пришедшаго обновити Адама, ядию в тление падшаго лютее, от Святыя Девы неизреченно воплотившагося нас ради, верни единомудренно песньми величаем.

Просветився от Бога Слова постническою добротою, отче Трифоне, одеян ризою нетления и венчан дарований паче ума человеча, предстоиши Господеви радуяся.

Во обители присноживотныя Господа своего вселился еси, преблаженне, идеже апостольстии престоли, мученичестии собори, преподобных собори, праведных собрания, пророческие ликования, с ними же тя величаем.

Всесветел показался еси, Богоглагольниче,  зарями Трисолнечнаго света озаряем, испросити от Христа ига прегрешений разрешение, и лютых избавление и злых сицевое тебе хвалословие поющим.

Богородичен: Воплотитися благоизволи неизреченно Владыка всяческих из Тебе, Богородительнице Матери, совершен Бог и человек, сохранив Тя прежде рождества, и в рождестве и по рождестве Девою, Егоже в сугубом естестве величаем.

 

 

Ин

     Ирмос:   Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества. Тем, веселящася, Тя, Богородице, величаем.

Возмогл еси о укрепляющем тя Господе державою Богоначальною, Трифоне богомудре, вся вражия силы попрати. Темже и венец яко победоносец приял еси, о нас, чтущих тя, Христови молися.

Якоже от неистощимаго источника, от святыя твоея раки струи исцелений истекают, и всякия болезни плотския и душевныя скверны силою Божественнаго Духа очищают, и благочестно наши напаяют сердца и помышления, почитающих тя.

Днесь всечестней твоей памяти, отче преподобне Трифоне, сошедшееся к цельбоносной твоей рацее всяк возраст требующа твоея помощи и заступления, усердно предстояще просим: поминай нас у престола Господа славы, чтущих священную память твою.

Взялся еси ко обителем вечным единосущныя Троицы, преподобне отче, и, взирая умныма очима, по достоянию к ликом преподобных причелся еси, с нимиже нас поминай, иже на земли тебе поминающих и песньми всегда почитающих.

Богородичен: Глас Архангельский вопием Ти, чистая Дево: радуйся, клятвы разрушение, преподобным слава и мучеником похвала, пророков проповедание и человеков спасение.

 

Светилен:

Подобен: Жены услышите:

     Мирскаго сладострастия яко многомятежна избег, неядением плоть свою увядил еси, отче, обновив же душевную крепость, преподобне, славою небесною обогатился еси, приснопамятне Трифоне, молися о нас непрестанно ко Господу.

Слава и ныне, Богородичен:

     Крепкое Твое предстательство, Марие Богоукрашенная, и светлая Твоя слава по всей земли показася. О Тебе ныне хвалимся и веселимся, имущи Тя к Сыну и Богу ходатаицу неусыпную, молитвами Твоими спасемся.

 

На хвалитех стихиры на 4, глас 8.

Подобен: О, преславнаго чудесе:

     Преподобне отче Трифоне, дар Богови избран сам себе принесл еси, бдении всенощное и умиление стяжав поучений Божественно, конечное смирение, веру, надежду и любовь нелицемерну, трезвение и милосердие истинное, бесстрастие, и молитву показал световиднейшую.

Преподобне отче Трифоне, во одеяние истинное и спасения одежду благочестивым разумом иский одеятися, худыми рубищи всегда свое тело покрывати не престал еси, и обнажил еси обнажившаго нас козни, силою укрепляем Божественнаго Духа.

Преподобне отче Трифоне блаженне, предочистив свою душу воздержанием, был еси честное и красное Святому Духу обителище. Темже лукавыя духи отгоняеши и недуги исцеляеши, всегда притекающим к тебе. О нас, восхваляющих тя, Христови помолися.

Преподобне отче Трифоне славне, обладав страстьми душевными, начальник монахом был еси, ко трудом воздержания сих наказуя усердно,  и представил еси Всевидцу Вседержителю. Пожив житие нескверно, блаженне, с ними же нас поминай, восхваляющих тя.

 

Слава, глас тойже:

    Воплощшемуся Богу нашему от Девы Матерее, нас ради обнищавшему, яко нищ духом себе самого принесл еси жертву живу и всесожжение приятно, всеблаженне, и дар честен; темже и приял еси  небесное наслаждение, к Нему же присно молися, молимся, помиловати нас.

 

И ныне, Богородичен: Владычице, приими:

Славословие великое и отпуст.

На литургии служба преподобническая.

Молитва преподобному отцу нашему

архимандриту Трифону Вятскому Чудотворцу

 

   О священная главо, преподобне отче авво Трифоне, земный ангеле и небесный человече, светильниче пресветлый, Вятскую страну озаряя чудесы, граду нашему стено и  утверждение, бедствующим крепкий помощниче, старцем утешителю, юных добрый наставниче, благочестия столпе, правоверия защитниче. Обители нашей (граду нашему) добрый хранителю, монахов похвало и украшение и иноческаго жития правило. Отеческих преданий истинный ревнителю, воздержания наказателю, постников благолепие, присный о нас к Богу молитвенниче, теплый о душах наших ходатаю: к тебе прибегаем и тебе припадающее, во умилении сердец наших молимся: призри на ны, недостойныя рабы твоя, и избави стадо твое, молитвами твоими стяжанное, от враг видимых и невидимых, завистно на нас восстающих и яростию зверскою поглотити хотящих, вемы бо, вемы, о пресвятый отче! Яко аще по беззакониям нашим и недостойни сотворихомся зрения  пречистых мощей твоих, но духом от нас неразлучно пребываеши, вся полезная нам ходатайствуя. Тебе бо, угодниче Божий, преблаженне Трифоне, неистощимое от Всеблагаго Владыки благодати и даров дадеся сокровище, еже целити недуги телесныя и отгоняти страсти душевныя, и от всех зол избавляти с верою имя твое призывающих. Ты убо не презри нас, молящихся тебе, и твоея просящих помощи, изми ны невидимым предстательством твоим от смущения и бури тмочисленных скорбей наших, за грехи наши нам пребывающих, избави от коварств и злобы, на нас находящия, юже человекоубийца и завистник диавол воздвизати не престает, да во отчаяния глубину низринет и похитит ны, яко овцы заблуждшия. Но, о предивный и преизящнейший отче! Пастырю наш предобрый, Богоносе Трифоне! Скоро потщися на помощь нашу, сохрани обитель твою (град наш святый) святую от глада, губительства, от молвы и мятежа, от запаления и бури, от нападений вражиих, и тлетворных ветр и от всякаго зла, и умилостиви от нас Богоприятными молитвами твоими Христа Бога нашего избавитися нам от греха и наветов вражиих; яко да заступлением твоим и помощию, в мире и тишине, творя волю Божию благоугодную и совершенную, зде поживем, и да сподобимся части святых Господем нашим Иисусом Христом, Емуже слава подобает, честь и поклонение, и ныне, и во вся будущия веки. Аминь.

 

 

На четвертой недели Великого поста в Субботу Трифону преподобному правятся панихиды и молебны, первое древняго установления, а последния правятся всегда, по желанию и усердию.

Прокопию юрдивому токмо панихиды.

 

Чин Акафиста,

бываемаго Пресвятей Богородице в каждую  субботу

в  Успенском Трифоновом монастыре на Вятке:

 

После многолетия становится среди храма Икона Благовещения Пресвятыя Богородицы. Священник, приняв кадило, а диакон – свещу, и обходя, иконы и алтарь кадят, а крилоса посменно поют: Возбранной воеводе победительная; и когда иерей обкадит, то став пред образ Божией Матери, начинает читать Акафист по ряду, якоже указася. И кончив оный, крилоса поют: Высшую небес, Трисвятое, по Отче наш. По сем припев: Пресвятая Богородице спаси нас. Иерей чтет молитву Божией Матери: Прими Всеблагомощная, Пречистая Госпоже Владычице Богородительнице (до конца). По сем поют: Владычице, прими молитву раб Твоих, — и отпуст.

СКАЧАТЬ: Никодимовская служба преп Трифону Вятскому

(Просмотров 295)

Добавить комментарий

Ваш e-mail не будет опубликован. Обязательные поля помечены *